Албатта, намоз фаҳш ишлардан тўсади

Бундан 15, 20 кунлар аввал қабулимга асли вилоятлик бўлиб бу ерда беш йилдан буён бозорда савдо билан шуғулланиб тирикчилик қиладиган деб ўзини таништирган чамаси 35 ёшларда бўлган, танасида озгина маст қилувчи ичимлик ичганлик асорати бор бир йигит кириб ўзининг ҳаётида кечаётган қийинчиликдан шикоят қилиб ҳатто охири вақтларда катта қарзга кириб қолганидан ичкиликка ружуъ қўйиб баъзида кўнглига ўз жонига қасд қилиш фикри келаётганини айтиб қолди, мен унга бу дунё синов, имтиҳон ҳаёти ва ўзини ўлдирган билан инсон ғам ғуссалардан қутилиб қолмаслиги аксинча ўзини ўлдириш инсоннинг ҳалокатга ташланишининг илк бошланиши ва шу билан бирга охиратда ундай кишига бериладиган азоб уқубатлар берилишини, муқаддас динимизда бу иш гуноҳи кабиралардан эканлигини тушунтириб ундан кўра Аллоҳга тавба қилинг, намозни ўқишни бошланг, намозни ўзи сизни тўғри йўллаб қўяди деб анчагина насиҳат қилиб қўйган эдим.

22 август куни пешин намозидан кейин яна қабулимга шу йигит кириб, мен айтган насиҳатимдан кейин буткул ичкиликни ташлаб, авваллари борига ошна бўлиб авраб бунинг пулига еб ичиб номига улфатчилик қиладиганлар бу йигитнинг ичкиликни ташлаб намозни бошлаганини эшитиб ўзларини олиб қочаётганини кўриб буларнинг хеч бири содиқ дўст эмаслигини тушуниб етганини, ўша куннинг эртасидан масжидимизда ҳар кун беш маҳал намоз ўқиётганини ва ҳозирда Чорсудаги “Эски жува” бозорида кийим кечак савдоси билан шуғулланиб борига қаноат қилиб, кўнгли хотиржам бўлганини тўлқилланиб ташаккур айтиб чиқиб кетди.

Биз бир сабабчи холосмиз, аммо бу касалликка малҳам бўлган яратган Роббимнинг каломидаги ўзгармас қонуни бўлган: “…Албатта, намоз фаҳш ва ёмонликлардан қайтарур! Албатта, Аллоҳнинг зикри (барча нарсадан) улуғдир! Аллоҳ қилаётган ишларингизни билиб турур” (Анкабут сураси 45 оят) деб марҳамат қилган ояти каримасининг биргина адашган бандасини тўғри йўлга солиш учун қилган муолажасидир. Ҳар намозда бу йигитни жамоатга бардавом бўлиб, намозга эртароқ келиб масжидимиздаги китоб жавонидан китобларни диққат билан ўқиётганини кўриб тўғриси кўзларим қувониб кетади. Баъзида ўқиб тушунмаган жумласини астойдил келиб сўрайди.

Илоҳим, ораларимизда намоздан бенасиб бўлганларга ҳам яратган Роббим давомли намоз ўқишни насиб этсин!

Илҳомжон Мадалиев,
“Мўйи Муборак” “Уккоша жоме масжиди имом хатиби