ukkosha.shosh.uz "Мўйи Муборак" "Уккоша" жомеъ масжиди
Шайхул ислом, Муфтий Муҳаммад Тақий Усмоний ҳафизаҳуллоҳ айтадилар:
Инсонни яратишдан мақсад ибодат бўлса, у ҳолда бунинг талаби шу эдики, инсон дунёга келганда, эрталабдан кечгача ибодатдан бошқа бирор иш қилмаслиги ва унга бошқа иш қилишига рухсат ҳам бўлмаслиги керак эди. Чунончи, бошқа ўринда Қуръони карим шундай дейди:
إِنَّ اللّهَ اشْتَرَى مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الجَنَّةَ
Яъни: “Албатта, Аллоҳ мўминлардан уларнинг жонлари ва молларини жаннат эвазига сотиб олди” (Тавба сураси, 111-оят).
Аллоҳ таъоло мўъминлардан жонлари ва молларини сотиб олди ва бунинг эвазига охиратда уларга жаннат бўлишини таъйин қилди. Бизнинг жонимиз аллақачон сотиб олинган бўлса, у ҳолда бизда турган бу жонимиз бизники эмас, балки, сотиб олинган молдир. Унинг нархи тўлаб ҳам қўйилган. Бу жон ўзимизники бўлмаса, у ҳолда бунинг талаби шуки, ушбу жон ва жисмни Аллоҳга ибодатдан бошқа ишга ишлатилмасин. Шунга кўра, бизга Аллоҳ таъоло тарафидан “Сенга эрталабдан кечгача бошқа иш қилишга рухсат йўқ, бас, доим сажда қилиб тур, доим Аллоҳ, Аллоҳ деб тур, бошқа ишга рухсат йўқ. Касб қилишга ҳам рухсат йўқ. Таом ейишга ҳам рухсат йўқ”, деб ҳукм қилинса, у ҳолда бу ҳукм ҳам адолатга хилоф бўлмас эди. Чунки, инсон айнан шу ибодат учун яратилган.
“Бундай харидорга қурбон бўлинг”
Аллоҳ таъоло бизнинг жон ва молимизни сотиб ҳам олган ва унинг нархини тўлиқ тўлаб ҳам қўйган, яъни, жаннат. Кейин эса “бу мол ва жонни ўзингизда сақланг”, деб мол ва жонимизни ўзимизга қайтариб ҳам берган ва бизга енг, ичинг, касб қилинг ва дунё ишларингизни қилинг. Бас, доим беш вақт намоз ҳам ўқиб туринг ва фалон фалон нарсалардан сақланинг. Қолган ишларда қандай хоҳласангиз, шундай қилинг деб рухсат ҳам берган. Бундай харидорга қурбон бўлинг. Бу Аллоҳ таъолонинг буюк раҳмати ва иноятидир.
“Ислаҳий хутбаат” китобидан
Абдулқаййум Комил таржимаси
